اشرف یوسفی

اشرف یوسفی فیصل آباد کے اہم شاعر ہیں اور بہت عمدہ نعت کہتے ہیں

نمونہ کلام

تو بہار ِ دل و جاں تجھ سےہے دنیا سر سبز

نعت ِ رسول ِ کریم صلی اللہ علیہ و آلہ وسلم

تو بہار ِ دل و جاں تجھ سےہے دنیا سر سبز

سبز باغات ترے گنبد ِ خضریٰ سر سبز

سبز آثار کھجوروں کے لہکتے ہوۓ ڈال

سرِ صحرا وہ ترے نقش ِ کف ِ پا سر سبز

ہفت اقلیم ثمر بار ترے دامن سے

تیرے دم سے ہوا ہر ایک زمانہ سرسبز

از زماں تابہ زماں تیری جبیں کا پرتو

از افق تابہ افق تیرا عمامہ سرسبز

تیری رحمت سی نہیں ہے کوئ پر کیف فضا

تیری قربت سا نہیں ہے کوئ خطّہ سرسبز

تیری باران محبت سے جو رو گرداں ہے

لاکھ تسبیح کرے وہ نہیں ہوتا سر سبز

سرو ِ صد ناز چمن تجھ سے ہےعالم میں بہار

تیرے رخ سے ہوئ شاخ گل ِ رعنا سر سبز

کاش دیکھیں مری آنکھیں بھی ریاض الجّنہ

کاش ہو جاۓ مری کشت ِ تمنا سر سبز

پیکر ِ کشف و کرامات لکھوں نعت لکھوں

نعت رسول کریم صلی اللہ علیہ و آلہ وسلم

پیکر ِ کشف و کرامات لکھوں نعت لکھوں

حاصل ِ ارض و سما وات لکھوں نعت لکھوں

شجرۃ الکون ہے تو تجھ سے ہے عالم کا ظہور

پھل لکھوں پیڑھ لکھوں پات لکھوں نعت لکھوں

جس جگہ طائر ِ ادراک کے پر جلتے ہیں

اس سے آگے کی میں کیا بات لکھوں نعت لکھوں

چہرہ والشمس جبیں ماہ ِ مبیں ہے تیری

چشم و لب کوترے آیات لکھوں نعت لکھوں

حرف نکلے ہیں قلم سے کہ ستارے نکلے

شعر کو نور کی سوغات لکھوں نعت لکھوں

کیسا عالم ہے یہ در پر ترے شاھا آھا

نعت ِ رسول ِ کریم صلی اللہ علیہ وآلہ وسل

کیسا عالم ہے یہ در پر ترے شاھا آھا

ہمہ شاھاں ، ہمہ مسکین و گداھا آھا

تیری چوکھٹ پہ جبین ریز سلاطین ِ جہاں

خاکروبوں میں ترے فرماں روا ھا آھا

رومی و جامی و عطار تری رہ پہ نثار

شمس تبریز دمادم تنانا ھا آھا

خاک پر بوریا اور عرش پہ تکیہ تیرا

کہکشاؤں میں سواری تری آھا آھا

ذات ِ اقدس نے بھی تخلیق تجھے ویسے کیا

اپنی تخلیق کو جس شان سے چاھا آھا

تیرے ہر لفظ کے دامن میں جہان ِ معنی

تیرے ہر پل کو زمانون نے سراھا آھا

حسن ِ خوبان ِ جہاں پرتو ِ صد رنگ ترا

سب ترے نازوادا شوخ کلاھا آھا

تو ہے قرآن سراپا ترا آیات ِ مبیں

تو ہی حمٰ ہے یسٰین ہے طہٰ آھا

میں سیہ کار ترے مدح سراؤن میں شمار

تجھ پہ قربان شھا خلق پناھا آھا