برہنہ پاہوں میں،شہر امان جاتے ہوئے ۔ قاسم یعقوب

شاعر: قاسم یعقوب

مطبوعہ : نعت رنگ ۔ شمارہ نمبر 27

نعتِ رسولِ آخر صلی اللہ علیہ وآلہ وسلم

برہنہ پاہوں میں،شہر امان جاتے ہوئے

بہ احترام مدینے کا دھیان،جاتے ہوئے

نشان پا سے کفِ نقش پانہ چھو بیٹھوں

میں دے رہا تھا کٹھن امتحان،جاتے ہوئے

نبی کی حفظ پہ مامور بکریوں کوسلام

مٹائے ثور کے،سارے نشان،جاتے ہوئے

حضور صحبتِ حمزہ میں ہیں، میں دیکھتاہوں

راہ اُحد کی طرف ساربان جاتے ہوئے

میں اشکِ خواہشِ روضہ بہاتے آیا تھا

سبھی نے دیکھا مجھے شادمان جاتے ہوئے

خزاں رتوں میں کھلے ہیں کھجور کے پتے

ہمیشہ سبز رہے ہیں کھجور کے پتے

یہاں سے قافلۂ دینِ حق گزرنا ہے

سلامیوں کوجھکے ہیں کھجور کے پتے

میں چھو کے پائے محمد کی خاک ڈھونڈتا ہوں

کہ گرِدرہ سے بھرے ہیں کھجور کے پتے

جلاہوں دشتِ گماں کی جھلستی دھوپ میں جب

توچھاؤں بن کے ملے ہیں کھجور کے پتے

رہے ہیں شعبِ ابی طالب آپ کے ساتھی

چٹائیوں میں سجے ہیں کھجور کے پتے

پھراُن کے پھل میں کبھی گھٹلیاں نہیں آئیں

حضور نے جو چھوئے ہیں کھجور کے پتے

نورِ متاعِ جنتِ حرمین،ٹھیک ہے

ہم عامیوں کونسبتِ حسنین ٹھیک ہے

جو بھی غلط تھا متن کاحصہ ، نہیں رہا

کھینچیں جہاں تک آپ نے قوسین،ٹھیک ہے

اس عشقِ لازوال میں کیا کیا بچا مجھے!

ان سب میں اک حوالۂ نعلین ٹھیک ہے

عشقِ نبی میں حدِ غم وانبساط کیا!

نغمہ درست ہے یہاں اوربین ٹھیک ہے

مزید دیکھیے

زیادہ پڑھے جانے والے کلام
اے سبز گنبد والے منظور دعا کرنا ۔ صابر صابری تو شاہ خوباں، تو جان جاناں، ہے چہرہ ام الکتاب تیرا ۔ صائم چشتی لم یات نظیرک فی نظر مثل تو نہ شد پیدا جانا ۔ احمد رضا بریلوی نہ کہیں سے دور ہیں منزلیں ۔ منور بدایونی طائف میں کربلا کے سفینے کی روشنی ۔ نجمہ شاہین کھوسہ نسیما ! جانب بطحا گزر کن . مولانا عبدالرحمن جامی	مصطفٰے جانِ رحمت پہ لاکھوں سلام۔ امام احمد رضا خان بریلوی حضور ایسا کوئی انتظام ہو جائے ۔ سید صبیح الدین صبیح رحمانی حدود طائر سدرہ حضور جانتے ہیں ۔ سرور حسین نقشبندی اس کرم کا کروں شکر کیسے ادا ۔ عبدالستار نیازی یا نبی نظر کرم فرمانا اے حسنین کے نانا ۔ اوصاف علی زمین و زماں تمہارے لیے۔ امام احمد رضا خان بریلوی