خواہش ہے مجھے ارضِ مدینہ کے سفر کی

شاعر: مشاہد رضوی

<ref></ref>===نعتِ رسولِ آخر صلی اللہ علیہ وآلہ وسلم===

خواہش ہے مجھے ارضِ مدینہ کے سفر کی

توفیق ملے کاش مجھے پھر سے حَضَر کی

کونین ہوئی جس کی تجلی سے فروزاں

ہو دید کبھی مجھ کو بھی اس رشکِ قمر کی

لمحے میں درخشندہ ہوا کوکبِ اقبال

’’جب اپنی طرف آقا و مولیٰ نے نظر کی‘‘

جن راہوں نے قدموں کا لیا آپ کے بوسہ

توصیف رقم کیسے ہو اس راہ گزر کی

خود خالقِ کونین ہے جب آپ کا واصف

مدحت میں ہو پھر تاب بھلا کیسے بشر کی

حالات مرے جب ہیں عیاں شاہِ رسل پر

پھر کیا ہو غرض کچھ بھی مجھے ان کو خبر کی

ہے پیش جو اشعار کا گلدستۂ خوش رنگ

خواہش ہے نہاں قلب ِمشاہدؔ میں اثر کی

یکم رمضان المبارک 1443ھ /3 ؍اپریل 2022ء بروز اتوار

٭٭٭