دور ہو رنج و الم شاہِ امم

شاعر: مشاہد رضوی

نعتِ رسولِ آخر صلی اللہ علیہ وآلہ وسلم

دور ہو رنج و الم شاہِ امم

کھولیے بابِ کرم شاہِ امم

صورت و سیرت میں یکتا باخدا

آپ ہیں والا حَشَم شاہِ امم

دوش پر بارِ دوعالم لے لیا

اے مرے عالی ہِمَم شاہِ امم

آپ ہی تو ہیں عرب کے تاجور

آپ ہی شانِ عجم شاہِ امم

قاسمِ نعمت ، شہِ جود و سخا

دیجیے ہم کو نِعَم شاہِ امم

جو بُری تقدیر ہو کردیں بھلی

کھول دیجے پیچ و خم شاہِ امم

میری تربت ہو بقیعِ پاک میں

نکلے روضے پر یہ دم شاہِ امم

جو لکھے ہر روز نعتیں آپ کی

ہو ودیعت وہ قلم شاہِ امم

نعت گوئی ہو مشاؔہد کا اَثاث

ذوقِ مدحت ہو نہ کم، شاہِ امم

۴؍رمضان المبارک 1443ھ/ 6؍ اپریل 2022ء بروز بدھ

٭٭٭

پچھلا کلام

زندگی جو گزارو گے سیرت کے ساتھ

اگلا کلام

عمر بھر مجھ کو خدا محوِ عبادت رکھنا