آنکھوں میں اشک دل میں ہو الفت رسول کی ۔ عبدالغفار حافظ

شاعر: عبدالغفار حافظ

نعتِ رسولِ آخر صلی اللہ علیہ وآلہ وسلم

آنکھوں میں اشک، دل میں ہو الفت رسول کی

کیجے اس اہتمام سے مدحت رسول کی

پھونکوں سے بجھ نہ پائے گی وہ روزِ حشر تک

کہتے ہیں جس کو شمعِ ہدایت رسول کی

اے رہروانِ منزل عرفان وآگہی

ہے سنگِ میل راہ میں سُنّت رسول کی

ہے آخری مقام جو عقل وشعور کا

اس سے کہیں بلند ہے رفعت رسول کی

مقبول بارگاہِ خدا ہے وہ خوش نصیب

پیشِ نگاہ جس کے ہے سیرت رسول کی

مطلوب ہے جو حُبّ خداوندِ ذوالجلال

لازم ہے پہلے کیجے اطاعت رسول کی

عظمت کو اس بشر کی ملک بھی نہ پا سکے

جس کو ہوئی نصیب زیارت رسول کی

آتے ہیں اس یقین سے کہ خالی نہ جائیں گے

ہے سائلوں کے علم میں عادت رسول کی

حافظ کہاں، ثنائے حبیب خدا کہاں

اللہ کا کرم ہے عنایت رسول کی