اُنؐ کے دَر پر گئے گردِ راہِ سفر جسم پر رکھ کے ہم ۔ اختر لکھنوی

اُنؐ کے دَر پر گئے گردِ راہِ سفر جسم پر رکھ کے ہم

اورپھر یہ ہوا،پہروں روتے رہے ،در پہ سر رکھ کے ہم

راستوں کی ہوا رہنما بن گئی ،سارباں بن گئی

جب چراغ ان کی چاہت کالیکر چلے ہاتھ پر رکھ کے ہم

جِس کی تقدیر میں فرق کوئی نہیں،شام کوئی نہیں

نور کے شہر سے لائے ہیں،آنکھ میں وہ سحر رکھ کے ہم

اپنے رب سے دُعا مانگتے وقت اب شرم آتی نہیں

ان کی دہلیز سے آئے اپنی دعامیں اثر رکھ کے ہم

اپنی ہررات رکھتے ہیں روشن بہت اور معطّر بُہت

اِک چراغِ وفا ان کی یادوں بھرے طاق پر رکھ کے ہم

فہرست رہنمائی