اب بار گناہوں کا اٹھایا نہیں جاتا ۔ ذوالفقار علی دانش

شاعر: ذوالفقار علی دانش

نعت ِ رسول ِ کریم صلی اللہ علیہ وآلہ وسلم

اب بار گناہوں کا اٹھایا نہیں جاتا

لللہ کرم ، دل کا تڑپنا نہیں جاتا

سرکار کےدر سے جو گزرتا نہیں جاتا

اللہ کے دربار وہ رستہ نہیں جاتا

دربارِ محمد پہ بھرے جاتے ہیں دامن

اس در سے کبھی کوئی بھی ٹالا نہیں جاتا

کر ٹھیک عقیدہ جو تجھے چاہیے نعمت

کچھ قاسمِ نعمت سے چھپایا نہیں جاتا

کس کام کا وہ شعر ، غزل ، نظم ، رباعی

سرکار کی مدحت میں جو لکھّا نہیں جاتا

پھر آنے کو سرکار نہ گر بھیجتے خود ہی

واللہ وہاں سے کبھی لوٹا نہیں جاتا

کس جا پہ مدینے میں قدم اُن کے پڑے ہوں

رکھتا ہوں قدم پھونک کے ، رکھّا نہیں جاتا

میں نے بھی نہیں چھوڑنا سرکار کا دامن

جب تک کہ مجھے حشر میں بخشا نہیں جاتا

دانش ! یہ ہے اللہ کے محبوب کا دربار

اس در سے کبھی کوئی اٹھایا نہیں جاتا

مزید دیکھیے

پچھلا کلام | اگلا کلام | ذوالفقار علی دانش کی حمدیہ و نعتیہ شاعری | | ذوالفقار علی دانش