مرے رسول مرے پیشوا سلام علیک

شاعر: مشاہد رضوی

نعتِ رسولِ آخر صلی اللہ علیہ وآلہ وسلم

مرے رسول مرے پیشوا سلام علیک

تمام خلق کے حاجت روا سلام علیک

قرارِ جانِ دلِ غم زدہ سلام علیک

ستم رسیدوں کے مشکل کشا سلام علیک

بروزِ حشر بچائیں گے آپ ہی ہم کو

شفیعِ روزِ جزا مصطفیٰ سلام علیک

خدا نے آپ کو مالک بنایا ہر شے کا

مرے حضور شہِ دوسَرا سلام علیک

اے ماہتابِ حرم رونقِ زمان و مکاں

اے شانِ رحمتِ ربِ العلیٰ سلام علیک

غریبوں بے کسوں مجبوروں کے انیس و معین

اے بحرِ جود و سخا و عطا سلام علیک

حضور آپ کی چشمِ کرم کا طالب ہوں

مرے کریم کرم آشنا سلام علیک

غم و الم کے بھنور میں پھنسی ہے کشتیِ زیست

بچائیں مجھ کو مرے ناخدا سلام علیک

ہو التفات مشاہدؔ پہ یانبی ایسا

پڑھے ہمیشہ یہ صبح و مسا سلام علیک

۱۳؍ رمضان المبارک 1443ھ/15 ؍اپریل 2022ء بروز جمعہ

٭٭٭

پچھلا کلام

دھوپ غم کی چھا نہ پائے بے اماں پر یانبی

اگلا کلام

رسولِ پاک نے کب کوئی انتقام لیا